موضوع: يوميّات أسرة مصرية جداً !! الحلقة الاولي8/26/2010, 00:57
<blockquote class="postcontent restore ">
الحلقـة الأولى: يـوم جديــد
استيقظت الأم سعاد في إرهاق واضح قبل الشروق بربع ساعة.. جاهدت لتحاول إيقاظ جسدها المجهد واللحاق بصلاة الفجر قبل الشروق مشيت على أطراف أصابعها كي لا توقظ زوجها الذي صلى قبلها.. توضأت وصلت الفجر وجلست لحظات ثم قامت الى المطبخ كي تحضر طعام الغداء كي يكون جاهزا عند عودتها من عملها حد في الدنيا يصبح يقشر بصل؟ - تمتمت في سرها ووجهها الوردي المشرب بحمرة يزدادا احمرارا من تقشير البصل.. سارعت لوضع اللحم ليسلق وهي تدعو الله الا يكون الجزار كالعادة ضحك على زوجها وأعطاه لحم عجوز لا ينضج الا بعد 6سنوات سارعت بضرب الطماطم في الخلاط ومدت يدها لاخراج كيس من البسلة المخلوطة بالجزر الى أعدتها بالأمس وهي تشاهد المسلسل العربي وتغالب النوم نظرت الى الساعة وجدتها السادسة والربع.. حالا ستبدأ غارة ايقاظ الأولاد للذهاب الى المدرسة
--
مرت على غرفة ابنها خالد وجدته مستلقي على فراشه بالعرض والغطاء مكوم على الأرض والغرفة في حالة فوضى كأن قنبلة نووية مرت بها وتركت ابنها حي يرزق اصحي يا خالد يالاّ ح تتأخر عن المدرسة.. مش كل يوم تعذبني على ما تصحى وأخذت تلتقط الاكواب الملقاة حول جهاز الكومبيوتر والأطباق الملقاء فوق الكتب في سيريالية عجيبة وحاولت بصعوبة استخراج كتبه من بين الانقاض بلا جدوى اصحى يابني بلاش غلب على الصبح - رد عليها بصوت نائم متذمر؟: ياماما حرام عليكي انا نايم الساعة 3 سيبيني انام شوية ردت بصوت غاضب اهتز له جسدها البدين: انت غبت امبارح من المدرسة.. يالاّ علشان تروح ولا عاوز ابوك يعملها لنا حكاية؟ انت ناسي انك في تانية ثانوي؟ ثانوية عامة يابني !!! 5 دقايق والاقيك لبست هدومك وخرجت من غرفته حاملة كارثة متحركة من الاكواب والاطباق والاوراق وذهبت الى غرفة ابنتها الصغري ملك ذات الثماني سنوات وكالعادة صراخ وبكاء وادعاء انها مصابة بمغص رهيييييب وان فيل هندي مر على قدمها بالليل ولهذا لا تستطيع الذهاب الى المدرسة خرجت الام من غرفة ملك وهي تجري على المطبخ بعد ما شمت رائحة شياط البسلة.. وأخذت تهذي بكلمات ساخطة.. على الخلفة واللي بيخلفوها !!.. وانقذت البسلة بأعجوبة ووجدت اللحم.. كالعادة.. مازال أمامه ساعتين كي ينضج بعد ماامتص كل المرق ومازال كجلمود صخر هنا فاض كيلها وصرخت في كل النائمين: حرام عليكم انا ح ألاقيها من الطبيخ ولا من الشغل ولا من تنضيف البيت ولا من المدارس.. يالاّ كلكم تصحوا في دقيقة واحدة وكأن هذه الصرخة هي علامة الخطر بالنسبة لخالد وملك فقاموا على الفور من غرفهم.. وكالعادة المعركة اليومية على دخول الحمام التي انتهت بتسرب ملك كالزئبق من فتحة الحمام وتركته يتوعد لها عندما تخرج ******* أعدت الأم الافطار ودخلت غرفتها كي ترتدي ملابسها على عجل لتلحق بعملها في موعدها.. فالأمر لا يحتمل شخطة من المدير ولا مقلب جديد من احدى الزميلات المخلصات استيقظ زوجها محمود على حركتها وهي ترتدي ملابسها ودون أن يفتح عينيه كي لا يطير النوم منهم قال لها بصوت متذمر: هو مفيش يوم الواحد يصحى من غير سارينة الانذار دي؟ كادت ترد عليه بعصبية ولكن لم تشأ ان تبدأ يومها بخناقة وجزت على أسنانها وهي تنظر للساعة في استغاثة: صباح الخير يامحمود الولاد ما بيصحوش الا بالطبل البلدي.. يالاّ أحسن ح تتأخر على شغلك انت كمان دفن رأسه تحت المخدة وهو يقول: لسه ح انام شوية كمان تمتمت في سرها: هم العيال جايبينه من برة؟.. وضبطت له المنبه ليوقظه بعد ربع ساعة كي لا تقوم غارة عند عودتها انها هي من تركته نائم وانها السبب في تأخيره اتمت ارتداء ملابسها وخرجت وجدت خالد وملك ارتدوا ملابس المدرسة ويتناولون الافطار.. وامسكت شعر ملك لتمشيطه وهي تأكل فاعترضت وقالت: ياماما كده الأكل ح ينزل في شعري فقالت لها في تعجب: ياستي اللماضة دي مش باشوفها الا في البيت وفي المدرسة بتسيبي البنات يضربوكي ليه؟ دافعت عن نفسها وقالت: لا ياماما محدش بيضربني ده انا اللي بأموّتهم من الضرب حتى اسألي خالد.. مش كده ياخالد؟ فأجاب على طريقة فؤاد المهندس: آه طبعا.. على يدي أنهت الأم الصراع المتوقع وقالت لخالد بطريقة آمرة: خالد.. توصّل أختك لحد باب المدرسة وما تسيبش ايديها مفهوم؟ ******* همّت بالخروج ثم عادت لتتأكد انها أغلقت البوتاجاز ولم تترك الحنفية مفتوحة.. ثم مرت على غرفة ابنتها الكبرى سلمى وفتحتها بهدوء ووجدتها نائمة في هدوء تحتضن الوسادة وكأنها تحتضن صورة فارس الاحلام وبجوارها عدة كتب يبدو انها أمضت الليل في قراءتهم وأيقظتها بهدوء فاستيقظت وهي تبتسم لأمها وتقول: لها صباح الخير ياقمر فأشرق وجه الأم لأول مرة منذ استيقاظها وقالت لابنتها في حنان: صباح النور ياحبيبتي.. بصي.. كمّلي سوا اللحمة واعملي الرز قبل ما اخواتك ييجوا وما تنسيش تنضفي البيت كويس.. يالاّ كمّلي نومك ياحبيبتي فردت بصوت نصف نائم: حاضر ياماما.. ثم احتضنت وسادتها وأكملت أحلامها نظرت اليها الأم بحنان وهمست: ربنا يعدلهالك ياسلمى يابنتي يارب
موضوع: رد: يوميّات أسرة مصرية جداً !! الحلقة الاولي8/29/2010, 15:06
السلام عليكم ورحمة الله وبركاته
اولا ازيكم ثانيا الردود اللى جاتلى قليلة قوى مش عارفة اكمل ولا ايه؟ عموما انا هنزل الحلقة التانية يمكن تعجبكوا
الحلقة التانية
دق المنبه بجوار سلمى معلنا العاشرة صباحا ومعلنا ايضا انتهاء الحلم الجميل الذى كانت تحلمه والذى تحلمه منذ سنوات!!!
مدت يدها لتسكت صوت المنبه المزعج وهى لا تزال مغمضة العينين وكأنها لا تريد ان تترك الحلم ابدا.....ثم قامت الى الحمام لتزيل اثار النوم عنها كى تبدأ رحلة الشقاء اليومى فى تنظيف الدمار الشامل الذى يتركه اخوتها خلفهم.......
دخلت المطبخ لتجد بقية الطعام لم يعد ومدفعية من الاطباق والحلل فى انتظارها
اعدت كوبا من الشاى وقطع من البسكويت لافطارهاواعادت فتح النار على اللحم كى تحدث المعجزة وينضج قبل وصول ثورة الجياع!!!!
ياساتر يارب هى حركة طالبان كانت بايتة مع خالد فى اودته؟!....بجد حرام كل يوم انظفها واخليها تبرق وهم ساعتين زمن ويخليها كأن قطر امبابة عدى من جواها!!!
انا ايه اللى خلانى اسيب الشغل بس؟ مش كان احسن من وجع القلب ده؟ بس احسن ازاى؟ده انا كنت باخد بالعافية 200 جنيه وباصرف اكتر منهم مواصلات ولبس وخلافه......ده غير عدد ساعات الشغل اللى ممكن توصل من9 صباحا لحد 6 مساءا وساعات اكتر لما يكون فيها جرد ولا حاجة......
لما بقيت زى لاجئى الصومال من الطاحونة اللى دايرة فيها ليل و نهار ده غير المضايقات اللى لازم تتعرض لها اى بنت وخصوصا لو كانت مش مرتبطة.......ياستى خلى البساط احمدى هو فيه حد سامعنا ما تقولى عانس!!!!!
خلاص ما بقيتش اخاف من الكلمة دى من كتر ما حسيتها فى عيون الناس يعنى انا داخلة على 29 سنة دلوقتى .......اصحاب كتير لى اتجوزوا و ولادهم داخلوا المدرسة كمان وبيقولوا لى طنط سلمى!!يعنى خلاص فاضل لك زلطة وتاخدى استمارة ستة يا جميل!!!!
ونظرت الى المرآة انظر الى ملامحى قد لا اكون جميلة بالمعنى المفهوم ولكن ملامحى متناسقة وشعرى طويليعنى متوسط الجمال زى آلاف البنات وكمان اهلى حالتهم متوسطة ....
يبقى العريس هيجى على ايه يا سمسمة ؟ دلوقتى كل واحد بيحسبها بالورقة والقلم هى بنت مين وعندها كام وجميلة قد ايه؟الا من رحم ربى يييييييه انا تعبت من التفكيرفى الحدوتة دى ......يعنى اللى اتجوزوا خدوا ايه؟
يالا بلا جواز بلا وجع قلب.....
واخذت تنظف حجرة ملك الصغيرة وهى تضحك على تعليقاتها المكتوبة بين طيات كراسات المدرسة (يارب المدرسة تتهد يوم الاثنين اللى جاى !!) (مش فاهمة حاجة خالص فى الحساب ولا العربى !!) (الميس دى غلسة اوى!!)
وانهت تنظيف الحجرة وجلست تستريح قليلا وهى تلملم الوان ملك واوراقها ووجدت نفسها تلعب بالالوان وترسم وكأنها تنفس عن بخار مكتوم بصدرها لم يجد له طريقا الا على الورق.......
رسمت بيت كبير على جدرانه قلوب واشجار بلا حواجز او جدران وبه رجل طويل القامة قوى البنيان حاد النظرات ولكن على شفتيه ابتسامة حنونة .....يمسك بيده ورود ونجوم ومفاتيح لغرف سريه مجهولة ..... وخلفه باب صغير نصف مغلق يطل منه رأس طفل جميل كأنه يختبأ من العالم ويحمل فى عيونه جمال الضوء ورقة النسيم....
وافاقت من احلامها على صوت جرس الباب وهو يعلن وصول اول القادمين وكان خالد......
(ايه اللى رجعك بدرى كده!!)
(عادى يا بنتى هو لازم استنى الحصة الاخيرة والحوارات دى؟ هو نص جنيه للبواب والدنيا تبقى فل!!)
فصرخت سلمى:(زوغت يافالح؟ والله لو بابا عرف ليقطم رقبتك)
فرد بملل (خلاص بقى خليكى حلوة وبلاش تقولى له وانا ح آكل وانام على طول علشان اسهر اذاكر للصبح يا جميل)
(امرى لله بس استنى شوية على ما اجهز لك الاكل..... ربنا يرحمنى من الغلب ده يارب!!)
فرد بتلقائية (ياستى ما احنا بقى لنا مية سنة بندعى...كبرى بقى يا سمسمة)
فتكهربت سلمى من رده الجارح وان كانت سمعت مثله كثيرا فى مجتمع لا يرحم الانثى الا لو كان فى احدى يديها صك اعتمادها كمخلوق من الدرجة الاولى ..... ولكنها لم تبدى ألمها وردت ببساطة (خليهم مية وواحد ياسيدى!!!!)
هام جداً: قوانين المساهمة فيالمواضيع. انقر هنا للمعاينة
احترم مواضيع الآخرينليحترم الآخرون مواضيعك لا تحتكر الموضوع لنفسك بإرسال عدة مساهماتمتتالية عند طرح موضوع يجب أن تتأكد أن عنوان الموضوعمناسب او لا تحل بحسن الخلق و بأدبالحوار و النقاش لا تنس أن اختلاف الرأي لا يفسد للود قضية, فلاتتهجم على عضو بدعوى أنه لا يشاطرك الرأي ان قطعت عهدآ مع عضو فأوفي بوعدك لأنه دينعليك إن حصل خلاف بينك و بين عضو حول مسألة ما فلاتناقشا المشكله على العام بل على الخاص اناحترمت هذه الشروط البسيطة, ضمنت حقوقك و عرفت واجباتك. و هذه افضل طريقةتضمن بها لنفسك ثم لمساهماتك و مواضيعك البقاء و لمنتداك الإزدهار فيموقعنا إدارة منتديات احلىحكاية
8/26/2010, 00:57
.....ثم قامت الى الحمام لتزيل اثار النوم عنها كى تبدأ رحلة الشقاء اليومى فى تنظيف الدمار الشامل الذى يتركه اخوتها خلفهم.......
واعادت فتح النار على اللحم كى تحدث المعجزة وينضج قبل وصول ثورة الجياع!!!!
يعنى متوسط الجمال زى آلاف البنات وكمان اهلى حالتهم متوسطة ....
.....
وردت ببساطة (خليهم مية وواحد ياسيدى!!!!)
شكرا لك 
مواضيع متميزة
