لاوساط الكروية العالمية هاليومين مالها سيرة غير منهو الاحسن بتاريخ كرة القدم هل هو مارادونا او ميسي؟.. وعلى هذا الاساس انشغلت المنتديات الرياضية والدواوين والاندية الثقافية بهذي المقارنة.. ناس مع مارادونا وناس مع ميسي!.. انتفض واحد من الشباب وهو يعزف سمفونية كركرة من شيشته بنادينا الثقافي وقال.. وعلى فكرة نادينا الثقافي هو واحد من الاندية اللي تارسة البلد ماكو مكان واللا فيه واحد منها لدرجة انك تلقاهم متجاورين.. ونادينا هذا ماله علاقة بأندية الشؤون للعلم.. لان نادينا الثقافي هو احد القهاوي المنتشرة بالكويت اللي تلم هالشباب اللي ماعندهم شغل ولان مافيه بديل غيرها.. المهم بعد التعريف بنادينا نرجع لسالفة الشاب اللي قال اش جاب لاجاب حرام عليكم مارادونا هالمتنبه.. هذا ميسي اللي متعبهم ومدوخهم ومجننهم ماكووو غيره هذا الفتى الذهبي اللي ماكل البرشومي كله حبة حبة.. مارادونا منهو هذا ميسي مافيه احد يقيش معاه لا كاكا ولا كريستيانو رونالدو ولا اي واحد بهذا الزمن ولا الزمن اللي قبله ولا حتى بالبلي ستيشن.. صاح احد الجالسين من اللي جالسين تحت لوحة التحذير الرسمي اللي تقول التدخين مضر وننصحك بالامتناع عنه براجو هات راس جديد يابو هناد.. ثم استعدل بجلسته واخذله نفس طويل وكنه برهة من الزمن ثم طلعه من مناخيره وقال ياعزيزي (تكت ايزي) واخذ الامر بكل بساطة مارادونا وبس.. ميسي منهو يابن الحلال توا الناس عليه علشان نقارنه بمعجزة القرن العشرين الكروية.. هو اش قدم غير كم قوول مع ناديه المتخم بالنجوم.. انا اعتقد لو انه بنادي غير برشلونة ماعرفه احد.. واترك عنك ناديه هو واش قدم لمنتخب بلاده الارجنتين.. معقولة لاعب فلته وينهزم فريقه من بوليفيا بالستة وهو يلعب معهم.. اشجابه لمارادونا إذا ماتدري مارادونا اللي مو عاجبك خلا الناس تحب الارجنتين بعد ماجاب لهم كاس العالم اللي بالمكسيك سنة 86.. ولعلمكم كلكم احبائي بمقهانا الثقافي قبل مارادونا مافيه احد يحب لعب الارجنتين لانهم ناس خشنين اكثر من اللازم.. ومو بس هذا إلا خلا الناس كلها تعرف وتشجع نادي الجنوب الايطالي نابولي احد ابطال معارك الصعود والهبوط بالسريا الاول الايطالي.. ان فاز معاه ببطولة الدوري اكثر من مرة ولعلمك الفريق حقق كاس الاتحاد الاوروبي هم بعد.. واش تبي اكثر مارادونا لعلمك عاش بزمن كله قصب سيقان وخشونة لو هي بعصرنا هذا اعتزل اغلب اللاعبين من اول اصابة وعلى راسهم ميسيكم هذا واللي بالمناسبة وعلشان ما اتجنى عليه اشوفه لليوم هذا احسن من اخلاق مارادونا.. وهو من احسن اللي يلعبون برجلهم الشمال بزمنا الحاضر.. وبالاخير يااعزائي اخلصكم مارادونا وبس واللي مو مصدق من عيال اليوم يروح يشتري سيديهات فن ماردونا من الاسواق مع خالص تحياتي لكم واقلب اللفته اللي فوق راسي ياراجووو.
هام جداً: قوانين المساهمة فيالمواضيع. انقر هنا للمعاينة
احترم مواضيع الآخرينليحترم الآخرون مواضيعك لا تحتكر الموضوع لنفسك بإرسال عدة مساهماتمتتالية عند طرح موضوع يجب أن تتأكد أن عنوان الموضوعمناسب او لا تحل بحسن الخلق و بأدبالحوار و النقاش لا تنس أن اختلاف الرأي لا يفسد للود قضية, فلاتتهجم على عضو بدعوى أنه لا يشاطرك الرأي ان قطعت عهدآ مع عضو فأوفي بوعدك لأنه دينعليك إن حصل خلاف بينك و بين عضو حول مسألة ما فلاتناقشا المشكله على العام بل على الخاص اناحترمت هذه الشروط البسيطة, ضمنت حقوقك و عرفت واجباتك. و هذه افضل طريقةتضمن بها لنفسك ثم لمساهماتك و مواضيعك البقاء و لمنتداك الإزدهار فيموقعنا إدارة منتديات احلىحكاية
3/26/2010, 14:20
